पुणे: भाजपचे सहयोगी खासदार संजय काकडे यांनी राष्ट्रवादी काँग्रेसच्या खासदार सुप्रिया सुळे यांचा बारामतीत, तर उदयनराजे भोसले यांचा साताऱ्यात जवळपास एक लाख मतांनी पराभव होईल, अशी आकडेवारी सादर केली. त्याचबरोबर संजय काकडे यांनी सुप्रिया सुळेंचा पराभव होईलच, शिवाय पश्चिम महाराष्ट्रातील भाजप-शिवसेना महायुतीचे सर्व 10 उमेदवार निवडून येतील, असा अंदाज व्यक्त केला.
संजय काकडे यांची आणि पुण्यातील भाजपचे उमेदवार गिरीश बापट यांची भेट झाली. गिरीश बापट यांनी संजय काकडे यांच्या घरी जाऊन चाय पे चर्चा केली. त्यानंतर संजय काकडे म्हणाले, भाजप-शिवसेना महायुतीचे पुणे आणि बारामतीसह पश्चिम महाराष्ट्रातील सर्व दहा जागांवर उमेदवार निवडून येतील. काँग्रेस-राष्ट्रवादी काँग्रेसच्या गडाला नक्कीच हादरा बसेल. त्याचबरोबर बारामतीतून सुप्रिया सुळेंचा 1 लाख मताधिक्याने पराभव होईल.
भाजपमध्ये पश्चिम महाराष्ट्रातील दिग्गज नेते येत असल्यामुळे आमची ताकद आणखी वाढली आहे. बारामतीत कांचन कुल यांच्याबाबत वातावरण अनुकूल आहे. याशिवाय खडकवासला, भोर, पुरंदर, दौंड मतदारसंघातून भाजपला आघाडी मिळेल. त्यामुळे सुप्रिया सुळेंचा पराभव निश्चित होईल, असा दावा संजय काकडेंनी केला. मी पुणे लोकसभा मतदारसंघात प्रचार करणार आहे. मी माझी जबाबदारी क्षमतेने पूर्ण केली. त्याचे निकाल सर्वांसमोर आहेत. गिरीश बापटांसोबत प्रचारासंदर्भात सविस्तर चर्चा झाली, असे काकडेंनी म्हटले आहे. केवळ पुणेच नाही तर बारामती आणि संपूर्ण पश्चिम महाराष्ट्रात भाजप-शिवसेना महायुतीच्या उमेदवारांचा प्रचार करणार असल्याचे काकडे म्हणाले.
Post a Comment